സന്ധ്യാസുന്ദരലിപിയില്‍...

ചിത്രം : ചാപ്റ്റേഴ്സ് (2012)

രചന : റഫീക്ക് അഹമ്മദ്

സംഗീതം : മെജോ ജോസഫ്

ആലാപനം : പ്രമോദ്,മഞ്ജരി  

സന്ധ്യാസുന്ദരലിപിയില്‍ 

ഒരു താരമനോഹരകവിത

അതു നീര്‍മിഴിത്തുമ്പിനാലെഴുതൂ....

നിന്‍ ജീവരാഗം പകരൂ...

എന്നോടോതിയ വരിയില്‍

പതിനായിരം രാവുകള്‍ കലരും

ഇനി ഈ അനുരാഗവും കടലായ്...

എന്നാത്മതാളം നിറയും...

മണ്ണിന്‍ വിസ്മയം തരുനിരയില്‍ 

നീളേ പൂവുകളായ്...

വിണ്ണിന്‍ സുസ്മിതം ഇരുളലയില്‍ 

ഏതോ നെയ്ത്തിരിയായ്‌...

ഒഴുകിടുമൊരു കുളിരലയിലെ

മധുമലര്‍മണമായ്...

തഴുകിടുമൊരു പുതുമഴയുടെ  

പരിഭവസുഖമായ്...

ആദ്യാനുരാഗാര്‍ദ്ര ഭാവങ്ങളാലേ 

അത്മാവിലാളുന്നൊരീണങ്ങള്‍...

ഏതോ പൂവണിത്താഴ്വരയില്‍

മായാവാഹിനിയായ്...

മേലേ കാര്‍മുകില്‍ത്തോണിയിലേ 

ഈറന്‍വാര്‍മതിയായ്...

ജനലഴികളില്‍ ഒരുകിളിയുടെ

മൃദുകരമൊഴിയായ്...

നടവഴിയിലെ പരിചിതമൊരു

പദമലരിതളായ്...

ഓരോ ദിനാന്തങ്ങള്‍ വാചാലമായി

മായാമയൂരങ്ങളായ് മാറി...

ആഴിക്കങ്ങേ കരയുണ്ടോ...

ചിത്രം : പടയോട്ടം(1982)

രചന : കാവാലം നാരായണപണിക്കര്‍

സംഗീതം : ഗുണസിംഗ് 

ആലാപനം : കെ ജെ യേശുദാസ്

ആഴിക്കങ്ങേ കരയുണ്ടോ...?

യാമങ്ങള്‍ക്കൊരു മുടിവുണ്ടോ...?  

അടങ്ങാത്തിരമാലവഴിയേ ചെന്നാലീ 

അല്ലിനു തീരമുണ്ടോ...?

നീലമേലാപ്പിന്‍ കീഴിലാലസ്യമാളും ഭൂമിയല്ലേ... 

വേനല്‍ച്ചൂടേറ്റു ദാഹനീരിനു പിടയും ഭൂമിയല്ലേ...

വീണുമടിഞ്ഞും വീണ്ടുമുണര്‍ന്നും

തിരകളൊടുവില്‍ പകരും കദനം ചൂടുന്നൂ...

അല്ലിനു തീരമുണ്ടോ...അല്ലിനു തീരമുണ്ടോ...

അന്തിവിണ്ണിന്‍റെ തങ്കത്താഴിക പൊന്തീ...കാറ്റുറങ്ങീ...

കാവല്‍ കാക്കുന്ന നീലനിഴലുകള്‍ മോഹം പൂണ്ടുനിന്നൂ...

ഉള്ളമുണര്‍ന്നൂ...ചിറകിലുയര്‍ന്നൂ...

തളര്‍ന്നു തനുവിലവശമിവിടെ വീഴുന്നൂ...

അല്ലിനു തീരമുണ്ടോ...അല്ലിനു തീരമുണ്ടോ...

         

                                         

എന്നിട്ടും നീയെന്നെ...

ചിത്രം : നസീമ (1983)

രചന : പി ഭാസ്ക്കരന്‍ 

സംഗീതം : ജോണ്‍സണ്‍ 

ആലാപനം : എസ് ജാനകി 

എന്നിട്ടും നീയെന്നെ അറിഞ്ഞില്ലല്ലോ...!

എന്നാര്‍ദ്രനയനങ്ങള്‍ തുടച്ചില്ലല്ലോ...!

എന്നാത്മവിപഞ്ചികാ തന്ത്രികള്‍ മീട്ടിയ 

സ്പന്ദനഗാനമൊന്നും കേട്ടില്ലല്ലോ...!    

അറിയാതെയവിടുന്നെന്‍ അടുത്തുവന്നൂ  

അറിയാതെ തന്നെയെന്നകത്തുവന്നൂ...

ജീവന്‍റെ ജീവനില്‍ സ്വപ്‌നങ്ങള്‍ വിരിച്ചിട്ട

പൂവണിമഞ്ചത്തില്‍ ഭവാനിരുന്നൂ...

നിന്‍ സ്നേഹമകറ്റാനെന്‍ സുന്ദരസങ്കല്‍പം 

ചന്ദനവിശറികൊണ്ട് വീശിയെന്നാലും

വിധുരയാമെന്നുടെ നെടുവീര്‍പ്പിന്‍ ചൂടിനാല്‍ ഞാന്‍ 

അടിമുടി പൊള്ളുകയായിരുന്നൂ...

         

വിണ്ണിലുള്ള താരകമേ...

ചിത്രം : ഉമ്മിണിത്തങ്ക (1961) 

രചന : പി ഭാസ്ക്കരന്‍ 

സംഗീതം : വി ദക്ഷിണാമൂര്‍ത്തി 

ആലാപനം : പി ലീല 

വിണ്ണിലുള്ള താരകമേ 

കണ്മഷി കടം തരുമോ 

വെണ്ണിലാവേ നിന്‍റെ

കണ്ണാടി നീ തരുമോ  

ചമഞ്ഞിട്ടും ചമഞ്ഞിട്ടും

ചന്തം വരുന്നില്ലല്ലോ

ചന്ദനത്താലവുമായ്

ചന്ദ്രാ നീ വന്നിടുമോ

വാടാത്ത പുഷ്പമാല 

തിരുമാറില്‍ ചാര്‍ത്തിടുവാന്‍

കാട്ടുമുല്ലേ കൈനിറയെ

പൂവുകള്‍ നീ തന്നിടേണം

മനതാരിന്‍ മണിവീണ

മായാമനോഹരമായ്   

തിരുമുമ്പില്‍ മീട്ടി മീട്ടി

പാടിടേണം

പ്രേമത്തിന്‍ കൊട്ടാരത്തില്‍

പട്ടാഭിഷേകമല്ലോ

മാരനെപ്പോല്‍ സുന്ദരനാം 

മന്നവനും വന്നുവല്ലോ

ചിരി വേണം കളിവേണം

പൊന്നിന്‍ ചിലങ്കകളേ

മുരളിതന്‍ ഗാനം വേണം

രാക്കുയിലേ..   

പ്രഭാമയീ...പ്രഭാമയീ...

ചിത്രം : ലേഖയുടെ മരണം ഒരു ഫ്ലാഷ്ബാക്ക് (1983)

രചന : ഓ എന്‍ വി കുറുപ്പ് 

സംഗീതം : എം ബി ശ്രീനിവാസന്‍ 

ആലാപനം : പി ജയചന്ദ്രന്‍ 

പ്രഭാമയീ...പ്രഭാമയീ... 

സുവര്‍ണമുഖി നിന്‍ നെറ്റിയിലാരീ

സൂര്യതിലകം ചാര്‍ത്തി...

പ്രകൃതിയൊരുക്കിയ പന്തലിലാരുടെ 

പ്രതിശ്രുതവധുവായ് നീ വന്നൂ...

വന്നൂ...വന്നൂ...നീ വന്നൂ...

അരുമയായനന്തന്‍ മന്ത്രങ്ങളെഴുതിയ 

അഴകോലും ഒരു തങ്കക്കതിരല്ലെ നീ...

മടിയില്‍ വച്ചതിലെഴും മധുരമാം മന്ത്രങ്ങള്‍

മനസിജ മന്ത്രങ്ങള്‍ ഉരുവിടും ഞാന്‍...പാരില്‍-

മനസിജ മന്ത്രങ്ങള്‍ ഉരുവിടും ഞാന്‍...

ഒളിചിന്നും അരയിലെ കാഞ്ചന കാഞ്ചിയില്‍ 

കളിയാടും ഒരു മുത്തായ്‌ ഇരുന്നെങ്കില്‍...

കളിയാടും ഒരു മുത്തായ്‌ ഇരുന്നെങ്കില്‍...ഞാന്‍

അതിനുള്ളില്‍ പുണരുമീ ഉടയാടത്തളിരിലെ

ഒരു വെറും ഇഴയായ് ഞാന്‍ പടര്‍ന്നുവെങ്കില്‍...

പദ്മതീര്‍ത്ഥക്കരയില്‍...

ചിത്രം : ബാബുമോന്‍ (1975)

രചന : മങ്കൊമ്പ് ഗോപാലകൃഷ്ണന്‍

സംഗീതം : എം എസ് വിശ്വനാഥന്‍ 

ആലാപനം : വാണി ജയറാം 

പദ്മതീര്‍ത്ഥക്കരയില്‍ 

ഒരു പച്ചിലമാളികക്കാട്...

പച്ചിലമാളികക്കാട്ടില്‍ 

ഒരു പിച്ചകപ്പൂമരക്കൊമ്പ്...

പിച്ചകപ്പൂമരക്കൊമ്പില്‍

രണ്ടുചിത്തിരമാസക്കിളികള്‍...

ഓരോ കിളിയെയും പാടിയുറക്കാന്‍ 

ഓമനത്തിങ്കള്‍ത്താരാട്ട്...

ആണ്ടോടാണ്ടെന്‍ പിറന്നാള് 

ആട്ടപ്പിറന്നാള്‍ തിരുനാള് 

അമ്മ ഇടംകവിളുമ്മ വയ്ക്കും

അച്ഛന്‍ വലംകവിളുമ്മ വയ്ക്കും 

താലോചിച്ചു വളര്‍ത്തും ഞാനൊരു-

കടിഞ്ഞൂല്‍ മുത്തല്ലോ-ഞാന്‍-

കടിഞ്ഞൂല്‍ മുത്തല്ലോ..

തുമ്പപ്പൂ വിതറും നീലരാവില്‍

തുള്ളിക്കളിക്കുന്ന പൂനിലാവില്‍  

തുണതേടി പെണ്‍കിളി കാത്തിരിക്കും

ഇണകളില്‍ ആണ്‍കിളി അരികില്‍ വരും

രാവിലുറങ്ങാന്‍ പാട്ടുപാടും 

രാഗവും താളവും ചേര്‍ത്തുപാടും

ഞാന്‍ ചേര്‍ത്തുപാടും...

ആരാരോ ആരീരാരോ...

   

മദ്യപാത്രം മധുരകാവ്യം ...

ചിത്രം : അമ്മയെന്ന സ്ത്രീ(1970)

രചന : വയലാര്‍ രാമവര്‍മ്മ 

സംഗീതം : എ എം രാജ 

ആലാപനം : കെ ജെ യേശുദാസ്  

മദ്യപാത്രം മധുരകാവ്യം 

മത്സഖീ നിന്നനുരാഗം... 

എല്ലാമരികില്‍ എനിക്കുള്ളപ്പോള്‍ 

എന്തിനു മറ്റൊരു സ്വര്‍ഗലോകം...

വെണ്ണിലാവിനെ ലജ്ജയില്‍ മുക്കും

വൈഡൂര്യമല്ലികപ്പൂവേ...

നിന്‍റെ ചൊടികളില്‍ മഞ്ഞുതുള്ളിയോ 

നിന്നിലെ സ്വപ്നത്തിന്‍ വീഞ്ഞോ...

ഇരിക്കൂ...അടുത്തിരിക്കൂ...

എനിക്കു ദാഹിക്കുന്നൂ...

ചുംബനത്തിന് ചുണ്ടുവിടര്‍ത്തും

സിന്ദൂരമുന്തിരിപ്പൂവേ...

എന്‍റെ യൗവനം എന്‍റെ വികാരം

എല്ലാം നിനക്കുമാത്രം...

നിറയ്ക്കൂ...മധു നിറയ്ക്കൂ...

എനിക്കു ദാഹിക്കുന്നൂ...

കറുത്ത ചക്രവാള...

ചിത്രം : അശ്വമേധം(1967)

രചന : വയലാര്‍ രാമവര്‍മ്മ 

സംഗീതം : ജി ദേവരാജന്‍ 

ആലാപനം : പി സുശീല  

കറുത്ത ചക്രവാള മതിലുകള്‍ ചൂളും 

കാരാഗൃഹമാണ് ഭൂമി...ഒരു-

കാരാഗൃഹമാണ് ഭൂമി...

തലയ്ക്കു മുകളില്‍ ശൂന്യാകാശം

താഴേ...നിഴലുകളിഴയും നരകം...

വര്‍ണചിത്രങ്ങള്‍ വരയ്ക്കുവാനെത്തുന്ന 

വൈശാഖസന്ധ്യകളേ...

ഞങ്ങളെ മാത്രം കറുത്തചായം മുക്കി

എന്തിനീ മണ്ണില്‍ വരച്ചു...വികൃതമായ്

എന്തിനീ മണ്ണില്‍ വരച്ചൂ...

വാസനപ്പൂമ്പൊടി തൂകുവാനെത്തുന്ന

വാസന്ത ശില്‍പ്പികളേ...

പൂജയ്ക്കെടുക്കാതെ പുഴുകുത്തി നില്‍ക്കുമീ 

പൂക്കളെ നിങ്ങള്‍ മറന്നോ...കൊഴിയുമീ

പൂക്കളെ നിങ്ങള്‍ മറന്നോ...            

അനുപമേ...അഴകേ...

ചിത്രം : അര നാഴിക നേരം(1970)

രചന : വയലാര്‍ രാമവര്‍മ്മ 

സംഗീതം : ജി ദേവരാജന്‍

ആലാപനം : കെ ജെ യേശുദാസ്

അനുപമേ...അഴകേ...

അല്ലിക്കുടങ്ങളില്‍ അമൃതുമായ് നില്‍ക്കും

അജന്താശില്‍പമേ...

അലങ്കരിക്കൂ എന്‍ അന്തപ്പുരം

അലങ്കരിക്കൂ നീ...

നിത്യതാരുണ്യമേ...നീയെന്‍റെ രാത്രികള്‍ 

നൃത്തം കൊണ്ടു നിറയ്ക്കൂ...ഉന്മാദ- 

നൃത്തം കൊണ്ടു നിറയ്ക്കൂ...

മനസ്സില്‍ മധുമയമന്ദഹാസങ്ങളാല്‍ 

മണിപ്രവാളങ്ങള്‍ പതിക്കൂ...

പതിക്കൂ...പതിക്കൂ...

സ്വര്‍ഗലാവണ്യമേ...നീയെന്‍റെ വീഥികള്‍

പുഷ്പം കൊണ്ടു നിറയ്ക്കൂ...അനുരാഗ-

പുഷ്പം കൊണ്ടു നിറയ്ക്കൂ...

വിടരും കവിളിലെ മുഗ്ദമാം ലജ്ജയാല്‍ 

വിവാഹമാല്യങ്ങള്‍ കൊരുക്കൂ....

കൊരുക്കൂ....കൊരുക്കൂ....