മുട്ടിവിളിക്കുന്നു...

ചിത്രം : മനസ്വിനി (1968)

രചന : പി ഭാസ്‌ക്കരൻ

സംഗീതം : എം എസ് ബാബുരാജ്

ആലാപനം : എസ് ജാനകി   

മുട്ടിവിളിക്കുന്നു വാതിലില്‍ മധുമാസം

ഉദ്യാനപാലകാ... ഉണരുണരൂ... ഉണരുണരൂ..

പുത്തനാം രഥമേറി വന്നൂ വസന്തറാണി

ഉദ്യാനപാലകാ... ഉണരുണരൂ...

മരതകക്കാടുകള്‍ ആയിരമായിരം

നവരത്ന മണിദീപം കൊളുത്തി വച്ചു..

പരിമളതൈലം പൂശി പവിഴമല്ലികള്‍ കയ്യില്‍

പനിനീര്‍ വീശറിയേന്തി ഒരുങ്ങിയല്ലോ.. 

സ്വപ്നവൃന്ദാവനത്തില്‍ പൂവിറുക്കുവാന്‍ വന്ന

അപ്സരരമണിയാണീ വസന്തം...

മുഗ്ദ്ധമാം പ്രേമത്തിന്‍റെ മുത്തുക്കുടയുമായി

എത്തുക നീ ഇവളെ എതിരേൽക്കുവാൻ.. 

  

          

ആയിരം ഇതളുള്ള താമരപ്പൂവിൽ

ചിത്രം : അമ്മേ ഭഗവതീ (1986)

രചന : ശ്രീകുമാരൻ തമ്പി 

സംഗീതം : എം എസ് വിശ്വനാഥൻ

ആലാപനം : കെ ജെ യേശുദാസ് , എസ് ജാനകി   

ആയിരം ഇതളുള്ള താമരപ്പൂവിൽ 

അമരുമെന്നമ്മയെ കൈതൊഴുന്നേൻ 

അഭയം തരൂ ലളിതാംബികയേ

ആദിപ്രകൃതിയെ കൈതൊഴുന്നേൻ

ആ മൂലപ്രകൃതിയെ കൈതൊഴുന്നേൻ

അമ്മേ നാരായണാ...ദേവീ നാരായണാ..

ലക്ഷ്മീ നാരായണാ...ഭദ്രേ നാരായണാ...

സത്യമായ് വന്നെന്നെ പുല്കിയതും 
അസത്യമായ് വന്നെന്നെ തള്ളിയതും 
സ്വപ്‌നങ്ങൾ തൻ മാനം കാണിച്ചതും 
ദുഃഖത്തിൻ കടലിൽ നീന്തിച്ചതും 
നീ തന്നെയല്ലേ എൻ അംബികേ 
നീ തന്നെയല്ലേ മൂകാംബികേ 

അമ്മേ നാരായണാ...ദേവീ നാരായണാ..

ലക്ഷ്മീ നാരായണാ...ഭദ്രേ നാരായണാ...

ദാരിദ്ര്യദുഃഖമകറ്റിടേണം
നിരാമയീ നീയെന്നെ കാത്തിടേണം 
എൻറെ നിശ്വാസമേ നിൻറെ ഗാനം 
എൻറെ വിശ്വാസമേ നിൻറെ നാമം 
കൊല്ലൂരിൽ വാഴുന്ന വരദായിനീ 
ചോറ്റാനിക്കര മേവും നാരായണീ   

  

എന്നിട്ടും നീയെന്നെ...

ചിത്രം : നസീമ (1983)

രചന : പി ഭാസ്ക്കരന്‍ 

സംഗീതം : ജോണ്‍സണ്‍ 

ആലാപനം : എസ് ജാനകി 

എന്നിട്ടും നീയെന്നെ അറിഞ്ഞില്ലല്ലോ...!

എന്നാര്‍ദ്രനയനങ്ങള്‍ തുടച്ചില്ലല്ലോ...!

എന്നാത്മവിപഞ്ചികാ തന്ത്രികള്‍ മീട്ടിയ 

സ്പന്ദനഗാനമൊന്നും കേട്ടില്ലല്ലോ...!    

അറിയാതെയവിടുന്നെന്‍ അടുത്തുവന്നൂ  

അറിയാതെ തന്നെയെന്നകത്തുവന്നൂ...

ജീവന്‍റെ ജീവനില്‍ സ്വപ്‌നങ്ങള്‍ വിരിച്ചിട്ട

പൂവണിമഞ്ചത്തില്‍ ഭവാനിരുന്നൂ...

നിന്‍ സ്നേഹമകറ്റാനെന്‍ സുന്ദരസങ്കല്‍പം 

ചന്ദനവിശറികൊണ്ട് വീശിയെന്നാലും

വിധുരയാമെന്നുടെ നെടുവീര്‍പ്പിന്‍ ചൂടിനാല്‍ ഞാന്‍ 

അടിമുടി പൊള്ളുകയായിരുന്നൂ...

         

സ്വര്‍ണപ്പൂഞ്ചോല...

ചിത്രം : യൌവനം(1974)
രചന : ശ്രീകുമാരന്‍ തമ്പി 
സംഗീതം : വി ദക്ഷിണാമൂര്‍ത്തി 
ആലാപനം : കെ ജെ യേശുദാസ്,എസ് ജാനകി 


സ്വര്‍ണപ്പൂഞ്ചോല-ചോലയില്‍
വര്‍ണത്തിരമാല
എന്റെ മനസ്സാം പൂഞ്ചോല...
എന്നും പാടും പൂഞ്ചോല...


സ്നേഹത്തിന്‍ ദാഹം....ആ-
ഗാനത്തിന്‍ രാഗം...
രാഗധാരയില്‍ നീന്തിയാടും
ദേവഹംസങ്ങള്‍...
ഭാവനതന്‍....വെണ്ണോടങ്ങള്‍...


ത്യാഗത്തിന്‍ സ്മേരം...ആ
ഗാനത്തിന്‍ താളം...
ചോലയോഴുകും കരയില്‍ വളരും
മോഹമല്ലികകള്‍
ആയിരമാര്‍ദ്ര...മോദിനികള്‍... 

   

കളിത്തോഴിമാരെന്നെ കളിയാക്കി...

ചിത്രം : മുറപ്പെണ്ണ്(1965)
രചന : പി ഭാസ്ക്കരന്‍ 
സംഗീതം : ബി എ ചിദംബരനാഥ് 
ആലാപനം : എസ് ജാനകി


കളിത്തോഴിമാരെന്നെ കളിയാക്കി-എന്‍റെ-
കളിത്തോഴിമാരെന്നെ കളിയാക്കി...
ഇടത്തുകണ്ണിടയ്ക്കിടെയിന്നലെ തുടിച്ചപ്പോള്‍    
കളിയാക്കി എന്നെ കളിയാക്കി-എന്‍റെ-
കളിത്തോഴിമാരെന്നെ കളിയാക്കി...

മാനസസരസിങ്കല്‍ പ്രേമത്തിന്‍ കളഹംസം
താമസമാക്കിയെന്നും പറഞ്ഞുണ്ടാക്കീ-
അവര്‍ പറഞ്ഞുണ്ടാക്കി...


അയലത്തെ കല്യാണത്തി-
ന്നവിടുന്നു മുമ്പില്‍ നില്‍ക്കെ
അവരെന്നെ ചൂണ്ടിക്കാട്ടി കളിയാക്കി...
കളഭത്തിന്‍ കിണ്ണമെന്‍റെ കൈതട്ടി മറിഞ്ഞപ്പോള്‍
കിലുകിലെയവര്‍ മണിച്ചിരിമുഴക്കീ...
അവര്‍ ചിരി മുഴക്കി...

          

     
          

മുറ്റത്തെ മുല്ലയില്‍...

ചിത്രം : ഓടയില്‍ നിന്ന്(1965)
രചന : വയലാര്‍ രാമവര്‍മ്മ
സംഗീതം : ജി ദേവരാജന്‍
ആലാപനം : എസ് ജാനകി


മുറ്റത്തെ മുല്ലയില്‍ മുത്തശ്ശി മുല്ലയില്‍
മുത്തുപോലെ മണിമുത്തുപോലെ
ഇത്തിരിപ്പൂ വിരിഞ്ഞു...പണ്ടൊ-
രിത്തിരിപ്പൂ വിരിഞ്ഞൂ...

മഞ്ഞില്‍ കുളിപ്പിച്ചു വെയിലത്തു തോര്‍ത്തിക്കും 

മടിയിലിരുത്തി പൂമുല്ല...

മുത്തണികിങ്ങിണിയരമണി കെട്ടിച്ച്  

നൃത്തം പഠിപ്പിച്ചു പൂക്കാലം...

നര്‍ത്തകിപ്പൂവിനെ പന്തലില്‍ കണ്ടൊരു

ചിത്രശലഭം വന്നൂപോല്‍

മുത്തം മേടിച്ച് മോതിരമണിയിച്ച് 

നൃത്തം കണ്ടു മയങ്ങിപ്പോയ്...

ചിത്രവിമാനത്തില്‍ മാനത്തുയര്‍ന്നപ്പോള്‍      

ഇത്തിരിപ്പൂവു പറഞ്ഞൂപോല്‍...
മുത്തില്ല മലരില്ല മുന്തിരിത്തേനില്ല
മുറ്റത്തെ മുല്ലക്കു മണമില്ല...  

മധുരമീനാക്ഷി...

ചിത്രം : യൌവനം(1974) 
രചന : ശ്രീകുമാരന്‍ തമ്പി
സംഗീതം : വി ദക്ഷിണാമൂര്‍ത്തി 
ആലാപനം : എസ് ജാനകി 


മധുരമീനാക്ഷി അനുഗ്രഹിക്കും 
എന്‍റെ മാനസവീണയില്‍ ശ്രുതിയുണരും    
നിര്‍മലസ്നേഹത്തിന്‍ പൂജാവീഥിയില്‍ 
എന്‍റെ സങ്കല്പങ്ങള്‍ തേര്‍തെളിക്കും.


പൂവിടാന്‍ ദാഹിച്ചോരെന്‍റെ തൈമുല്ലയില്‍
പുലരിയിലിന്നൊരു പൂ വിരിഞ്ഞൂ...
എന്നാത്മദാഹത്തിന്‍ ബിന്ദുവാണാമലര്‍
എന്‍ ജന്‍മസാഫല്യകാന്തിയല്ലോ...


എത്ര ജന്‍മങ്ങള്‍ കഴിഞ്ഞാലുമീസത്യ-
രക്തബന്ധത്തിന്‍ ചിറകുകളില്‍...
നമ്മളില്‍ മിന്നുന്ന ധന്യമാം ചൈതന്യം
ഒന്നായി നിര്‍ത്താന്‍ കൊതിക്കുന്നു ഞാന്‍....   
            

ഇരു കണ്ണീര്‍ത്തുള്ളികള്‍...

ചിത്രം : ഇരുട്ടിന്‍റെ ആത്മാവ്(1967)
രചന : പി ഭാസ്കരന്‍
സംഗീതം : എം എസ് ബാബുരാജ്‌  
ആലാപനം : എസ് ജാനകി


ഇരു കണ്ണീര്‍ത്തുള്ളികള്‍ ഒരു സുന്ദരിയുടെ
കരിമിഴികളില്‍ വച്ചു കണ്ടുമുട്ടി
കണ്ടുമുട്ടീ അവര്‍ കണ്ടു മുട്ടി-പിന്നെ
കണ്ടുവന്ന സ്വപ്‌നത്തിന്‍ കഥ ചൊല്ലി
താമരപ്പൊയ്കയിലെ അരയന്നങ്ങളെപ്പോലെ
പ്രേമത്താല്‍ പരസ്പരം കൈനീട്ടീ...      


അടുക്കുവാന്‍ അവര്‍ക്കെന്നും കഴിഞ്ഞില്ലാ 
അകലത്താണകലത്താണിരുപേരും...
കവിളിലേക്കൊഴുകുമ്പോള്‍ ഒരുമിക്കാമെന്നോര്‍ത്തു
കരളില്‍ പ്രതീക്ഷയുമായ് യാത്രതുടര്‍ന്നൂ... 


അടുത്തതില്ലാ അവര്‍ അടുത്തതില്ല
ഒരു നെടുവീര്‍പ്പിന്‍ കൊടുങ്കാറ്റില്‍ പിരിഞ്ഞുപോയി...
മരണത്തിന്‍ ഭീകര മരുഭൂവില്‍ വീണു രണ്ടു-
മഴത്തുള്ളിപോലെയവര്‍ തകര്‍ന്നുപോയീ...   
      

സുന്ദരരാവില്‍...

ചിത്രം : കൊച്ചനിയത്തി(1971) 

രചന : ശ്രീകുമാരന്‍ തമ്പി

സംഗീതം : പുകഴേന്തി

ആലാപനം : എസ്.ജാനകി 

സുന്ദരരാവില്‍ ചന്ദനമുകിലില്‍ 

മന്ത്രങ്ങളെഴുതും ചന്ദ്രികേ 

അനുരാഗത്തിന്‍ ആദ്യനൊമ്പരം

ആത്മനാഥനോടെങ്ങിനെ പറയും

വാസരസ്വപ്നം വാനില്‍വിടരും

വാടിക്കൊഴിയും രാവിന്‍മടിയില്‍

ആയിരം കഥകള്‍ പറയാന്‍ കൊതിക്കും 

അരികത്തു കണ്ടാല്‍ അടിമുടി വിറക്കും

എങ്ങിനെ...എങ്ങിനെ...

പറയുവതെങ്ങിനെ...

ആ വിളി കേള്‍ക്കാന്‍ ആ മാറില്‍ ചായാന്‍

ആ കാലടിയില്‍ മലരായ് വീഴാന്‍ 

ആത്മാവാം കിളി കൊതികൊള്ളുന്നു

അന്തര്‍ദ്ദാഹമിതെങ്ങിനെ പറയും

എങ്ങിനെ...എങ്ങിനെ...

പറയുവതെങ്ങിനെ...

       

അമ്പലവെളിയിലൊരാല്‍ത്തറയില്‍...

ചിത്രം : സ്ത്രീ(1970)

രചന : പി ഭാസ്കരന്‍

സംഗീതം : വി ദക്ഷിണാമൂര്‍ത്തി

ആലാപനം : എസ് ജാനകി

അമ്പലവെളിയിലൊരാല്‍ത്തറയില്‍ 
കൈക്കുമ്പിളില്‍ നാലഞ്ചു പൂക്കളുമായ്‌ 
കണ്ണുനീര്‍ചരടിന്‍മേല്‍
മാലകോര്‍ത്തിരിക്കുന്ന
സന്യാസിനിയാണ് ഞാന്‍-പ്രേമ-
സന്യാസിനിയാണ് ഞാന്‍...


ഉത്സവവേളയില്‍ സ്വപ്നരഥത്തിലെന്‍റെ         
വത്സലദേവന്‍ പുറത്തെഴുന്നള്ളുമ്പോള്‍   
കനവില്‍ നമസ്കരിച്ചു 
നിര്‍വൃതി കൊള്ളുമ്പോള്‍ 
നിഴലില്‍ മറയുന്നു ഞാന്‍-ദൂരെ- 
നിഴലില്‍ മറയുന്നു ഞാന്‍...


എന്തിനെന്നറിയീല എന്‍റെയീ പൂജാമാല്യം
എന്നും ഞാന്‍ കോര്‍ക്കുന്നു വിദൂരതയില്‍
ആരാധനയ്ക്കുമല്ല അലങ്കരിക്കാനുമല്ല
അധകൃതയല്ലോ ഞാന്‍-വെറും-
അധകൃതയല്ലോ ഞാന്‍...     

വാകച്ചാര്‍ത്തു കഴിഞ്ഞൊരു ദേവന്‍റെ...

ചിത്രം : ഇരുട്ടിന്‍റെ ആത്മാവ്(1967)
രചന : പി ഭാസ്കരന്‍
സംഗീതം : എം എസ്  ബാബുരാജ്‌
ആലാപനം : എസ് ജാനകി

വാകച്ചാര്‍ത്തു കഴിഞ്ഞൊരു ദേവന്‍റെ
മോഹന മലര്‍മേനി കണി കാണണം
കണികാണണം...കണ്ണാ...കണികാണണം
കമനീയ മുഖപത്മം കണികാണണം.


മഞ്ഞപ്പട്ടാട ചാര്‍ത്തി       
മണിവേണു കയ്യിലേന്തി
അഞ്ജനക്കണ്ണനുണ്ണീ ഓടിവായോ...
നിറുകയില്‍ പീലികുത്തി
ചുരുള്‍മുടി മേലേകെട്ടി
നീലക്കാര്‍വര്‍ണ്ണനുണ്ണീ ഓടിവായോ...


കാലില്‍ ചിലമ്പുകെട്ടി
പാലക്കാ മോതിരമായി
കാലികള്‍ മേയ്ക്കുമുണ്ണീ ഓടിവായോ...
ദുരിതത്തില്‍ നീന്തുമെന്നെ
സുകൃതത്തിന്‍ തീരംകാട്ടാന്‍
മുരഹരമുകുന്ദാ നീ ഓടിവായോ...      
     

മലരമ്പനറിഞ്ഞില്ലാ...

ചിത്രം : രക്തപുഷ്പം(1970)
രചന : ശ്രീകുമാരന്‍ തമ്പി
സംഗീതം : എം കെ അര്‍ജ്ജുനന്‍
ആലാപനം : പി ജയചന്ദ്രന്‍,എസ് ജാനകി


മലരമ്പനറിഞ്ഞില്ലാ...മധുമാസമറിഞ്ഞില്ലാ... 
മലര്‍ചൂടിയെന്‍ മനസ്സില്‍ ഒരു മോഹം
അധരമറിഞ്ഞില്ല ഹൃദയമറിഞ്ഞില്ല 
അറിയാതെ മൂളിപ്പോയ് ഒരു രാഗം


ഇളംകാറ്ററിഞ്ഞില്ലാ...ഇലകളറിഞ്ഞില്ലാ...
ഇവിടൊരു പാട്ടുകാരന്‍ മറഞ്ഞു നിന്നൂ 
ചിരി തൂകി...
ചിരിതൂകിയൊഴുകുന്ന ധനുമാസചന്ദ്രിക
വനമാകെ മധുമാരി ചൊരിഞ്ഞു നിന്നൂ...


മലരമ്പനറിഞ്ഞില്ലാ...മധുമാസമറിഞ്ഞില്ലാ...
മലര്‍ചൂടിയൊരു മോഹം കന്യകയില്‍...
അധരമറിഞ്ഞില്ല ഹൃദയമറിഞ്ഞില്ല
അറിയാതെ അവള്‍ പാടി ഹൃദയരാഗം 


കരയുന്ന കാട്ടുപൂവിന്‍ കരളിലെ നിത്യദാഹം
കണ്ടുനില്‍ക്കും കളിത്തെന്നല്‍ അറിയുന്നില്ല...
കദനത്തിന്നുള്ളില്‍ നിന്നും കൈപിടിച്ചുകയറ്റിയ
കരുണതന്‍ കാല്‍ക്കലിപ്പൂ കൊഴിഞ്ഞുവെങ്കില്‍...      


       

പ്രകാശനാളം ചുണ്ടില്‍ മാത്രം...

ചിത്രം : ഒരു വിളിപ്പാടകലെ(1982) 
രചന : പി ഭാസ്കരന്‍
സംഗീതം : ജെറി അമല്‍ദേവ്
ആലാപനം : എസ് ജാനകി

പ്രകാശനാളം ചുണ്ടില്‍ മാത്രം

മനസ്സിലാകെ മഹാന്ധകാരം

എല്ലാമഭിനയം പാതിരാവില്‍-

പൊലിഞ്ഞുപോയി വസന്തതാരം ...

അരങ്ങില്‍ മാത്രം...ഈ സംഗീതം...

അണിയറക്കുള്ളില്‍ വിലാപനാദം...

വിരൂപരൂപം വിഷാദവചനം

അഴിഞ്ഞ ചമയം ഇരുണ്ട വദനം...

കടമായ് വാങ്ങിയ തൂമന്ദഹാസം

അണിഞ്ഞു വേദിയിലണഞ്ഞ നേരം

അണകളെല്ലാം തകര്‍ന്നു വീണൂ

ആത്മാവിലൊഴുകീ കണ്ണീരിന്‍ധാര...

അകലെ അകലെ നീലാകാശം...

ചിത്രം : മിടുമിടുക്കി(1968) 
രചന : ശ്രീകുമാരന്‍ തമ്പി
സംഗീതം : എം എസ് ബാബുരാജ്‌
ആലാപനം : കെ ജെ യേശുദാസ്,എസ് ജാനകി


അകലെ അകലെ നീലാകാശം 
അലതല്ലും മേഘതീര്‍ത്ഥം.
അരികിലെന്‍റെ ഹൃദയാകാശം
അലതല്ലും രാഗതീര്‍ത്ഥം.

പാടിവരും നദിയും കുളിരും
പാരിജാതമലരും മണവും
ഒന്നിലൊന്നു കലരുംപോലെ
നമ്മളൊന്നായ്‌ അലിയുകയില്ലേ...

നിത്യസുന്ദരനിര്‍വൃതിയായ്‌ നീ
നില്‍ക്കുകയാണെന്നാത്മാവില്‍.
വിശ്വമില്ല നീയില്ലെങ്കില്‍;
വീണടിയും ഞാനീ മണ്ണില്‍.

ഈറനുടുത്തുംകൊണ്ടംബരം ചുറ്റുന്ന...

ചിത്രം : ഇരുട്ടിന്‍റെ ആത്മാവ്(1967)

രചന : പി ഭാസ്കരന്‍

സംഗീതം : എം എസ് ബാബുരാജ്‌

ആലാപനം : എസ് ജാനകി

ഈറനുടുത്തുംകൊണ്ടംബരം ചുറ്റുന്ന

ഹേമന്തരാവിലെ വെണ്‍മുകിലേ

കണ്ണീരില്‍ മുങ്ങിയോരെന്‍ കൊച്ചുകിനാവുകള്‍

എന്തിനീ ശ്രീകോവില്‍ ചുറ്റീടുന്നു....വൃഥാ

എന്തിനീ ദേവനെ കൈകൂപ്പുന്നൂ...

കൊട്ടിയടച്ചൊരീ കോവിലിന്‍ മുന്നില്‍ ഞാന്‍

പൊട്ടിക്കരഞ്ഞിട്ടു നിന്നാലും

വാടാത്ത പ്രതീക്ഷതന്‍ വാസന്തിപ്പൂമാല

വാങ്ങുവാന്‍ ആരാരും അണയില്ലല്ലോ...

മാനവഹൃദയത്തില്‍ നൊമ്പരമേല്‍ക്കാതെ

മാനത്തുചിരിക്കുന്ന വാര്‍തിങ്കളേ...

മൂടുപടമണിഞ്ഞ മൂഡവികാരത്തിന്‍

നാടകം കണ്ടുകണ്ടു മടുത്തുപോയോ

താനേ തിരിഞ്ഞും മറിഞ്ഞും...

ചിത്രം : അമ്പലപ്പ്രാവ്(1970)

രചന : പി ഭാസ്കരന്‍

സംഗീതം : എം എസ് ബാബുരാജ്

ആലാപനം : എസ് ജാനകി

താനേ തിരിഞ്ഞും മറിഞ്ഞും

തന്‍ താമരമെത്തയിലുരുണ്ടും

മയക്കംവരാതെ മാനത്തുകിടക്കുന്നു

മധുമാസസുന്ദരചന്ദ്രലേഖ...

ചന്ദനക്കട്ടിലില്‍ പാതിരാവിരിച്ചിട്ട

ചെമ്പകനിര്‍മ്മലര്‍ തൂവിരിപ്പില്‍

മധുവിധുരാവിനായ് ചുണ്ടുകളില്‍ പ്രേമ-

മകരന്ദമഞ്ഞതിലേന്തി...

പ്രേമതപസ്വിനീ.....പ്രേമതപസ്വിനീ

കാമുകസംഗമവേളയില്‍...

നാണിച്ചു നാണിച്ചു വാതിലടച്ചില്ലേ

മാനത്തെ പൊന്‍മുകിലിന്നലെ...