കേവല മര്‍ത്യഭാഷ...

ചിത്രം : നഖക്ഷതങ്ങള്‍(1986)

രചന : ഓ എന്‍ വി കുറുപ്പ്

സംഗീതം : ബോംബെ രവി

ആലാപനം : പി ജയചന്ദ്രന്‍

കേവല മര്‍ത്യഭാഷ കേള്‍ക്കാത്ത 

ദേവദൂതികയാണു നീ...ഒരു- 

ദേവദൂതികയാണു നീ...

ചിത്രവര്‍ണങ്ങള്‍ നൃത്തമാടും നിന്‍

ഉള്‍പ്രപഞ്ചത്തിന്‍ സീമയില്‍...

ഞങ്ങള്‍ കേള്‍ക്കാത്ത പാട്ടിലെ 

സ്വരവര്‍ണ്ണരാജികളില്ലയോ...

ഇല്ലയോ...

അന്തരശ്രുസരസ്സില്‍ നീന്തിടും 

ഹംസഗീതങ്ങളില്ലയോ...

ശബ്ദസാഗരത്തിന്‍ അഗാധ-

നിശ്ശബ്ദശാന്തതയില്ലയോ...

ഇല്ലയോ...    

എന്നോടൊത്തുണരുന്ന...

ചിത്രം : സുകൃതം(1994) 

രചന : ഓ എന്‍ വി കുറുപ്പ് 

സംഗീതം : ബോംബെ രവി 

ആലാപനം : കെ ജെ യേശുദാസ് 

പോരൂ...പോരൂ...

എന്നൊടൊത്തുണരുന്ന പുലരികളേ...

എന്നൊടൊത്തു കിനാവുകണ്ടു-

ചിരിക്കുമിരവുകളേ...    

യാത്ര തുടരുന്നൂ...ശുഭയാത്ര നേര്‍ന്നു വരൂ... 

ഒരു കുടന്ന നിലാവു കൊണ്ടെന്‍

നെറുകയില്‍ കുളിര്‍തീര്‍ത്ഥമാടിയ നിശകളേ... 

നിഴലുമായിണചേര്‍ന്നു നൃത്തംചെയ്ത പകലുകളേ...

പോരൂ...പോരൂ...

യാത്ര തുടരുന്നൂ...ശുഭയാത്ര നേര്‍ന്നു വരൂ... 

തുളസി വെറ്റില തിന്നു ചുണ്ടു

തുടുത്ത സന്ധ്യകളേ...

തുയിലുണര്‍ത്താന്‍ വന്നൊരോണ-

ക്കിളികളേ നന്ദി...

അമൃതവര്‍ഷിണിയായ വര്‍ഷാകാലമുകിലുകളേ...

ഹൃദയമെരിയേ അലരിമലരായ്

പൂത്തിറങ്ങിയ വേനലേ...

നന്ദി...നന്ദി...

യാത്ര തുടരുന്നൂ...ശുഭയാത്ര നേര്‍ന്നു വരൂ...