അമ്പാടി തന്നിലൊരുണ്ണി,,,

ചിത്രം : ചെമ്പരത്തി(1972) 
രചന : വയലാര്‍ രാമവര്‍മ 
സംഗീതം : ജി ദേവരാജന്‍
ആലാപനം : പി മാധുരി


അമ്പാടി തന്നിലൊരുണ്ണി
അഞ്ജനക്കണ്ണനാമുണ്ണി
ഉണ്ണിക്ക് നെറ്റിയില്‍ ഗോപിപ്പൂ...
ഉണ്ണിക്ക് മുടിയില്‍ പീലിപ്പൂ... 


ഉണ്ണിക്ക് തിരുമാറില്‍ വനമാല...
ഉണ്ണിക്ക് തൃക്കയ്യില്‍ മുളമുരളി...
അരയില്‍ കസവുള്ള പീതാംബരം
അരമണി കിങ്ങിണി അരഞ്ഞാണം...
ഉണ്ണീ വാ...ഉണ്ണാന്‍ വാ...
കണ്ണനാമുണ്ണീ വാ...


ഉണ്ണിക്ക് കണങ്കാലില്‍ പാദസരം
ഉണ്ണിക്ക് പൂമെയ്യില്‍ ഹരിചന്ദനം
വിരലില്‍ പത്തിലും പൊന്‍മോതിരം
കരിവള മണിവള വൈഡൂര്യം...
ഉണ്ണീ വാ...ഉറങ്ങാന്‍ വാ...
കണ്ണനാമുണ്ണീ വാ...


ഉണ്ണിക്ക് കളിക്കാന്‍ വൃന്ദാവനം
ഉണ്ണിക്ക് കുളിക്കാന്‍ യമുനാജലം
ഒളികണ്‍ പൂ ചാര്‍ത്താന്‍ സഖി രാധ
യദുകുലരാഗിണി പ്രിയരാധ...
ഉണ്ണീ വാ...ഉണര്‍ത്താന്‍ വാ...
കണ്ണനാമുണ്ണീ വാ...

         

നീലാംബരമേ...

ചിത്രം : ശരശയ്യ(1971)  
രചന : വയലാര്‍ രാമവര്‍മ
സംഗീതം : ജി ദേവരാജന്‍
ആലാപനം : പി മാധുരി


നീലാംബരമേ താരാപഥമേ
ഭൂമിയില്‍ ഞങ്ങള്‍ക്ക് ദുഃഖങ്ങള്‍ നല്‍കിയ
ദൈവമിപ്പൊഴും അവിടെയുണ്ടോ...അവിടെയുണ്ടോ...


വെള്ളിച്ചൂരലും ചുഴറ്റി വെള്ളത്താടിയും പറത്തി
നക്ഷത്രപ്പളുങ്കുകള്‍ പാകിയ വഴിയില്‍
നടക്കാനിറങ്ങാറുണ്ടോ...ദൈവം-
നടക്കാനിറങ്ങാറുണ്ടോ...
കണ്ണീരിവിടെ കടലായി-ഞങ്ങള്‍-
കണ്ടിട്ടൊരുപാടു നാളായി...


എല്ലാ പൂക്കളും വിടര്‍ത്തീ എല്ലാ മോഹവുമുണര്‍ത്തീ
കര്‍പ്പൂരവിളക്കുമായ്‌ നില്‍ക്കുന്ന ഞങ്ങളെ 
കടക്കണ്ണെറിയാറുണ്ടോ...ദൈവം 
കടക്കണ്ണെറിയാറുണ്ടോ...
കണ്ണീരിവിടെ കടലായി...ഞങ്ങള്‍- 

കണ്ടിട്ടൊരുപാടു നാളായി...

    

സമയമാം രഥത്തില്‍...

ചിത്രം : അരനാഴിക നേരം(1970)
രചന : വയലാര്‍ രാമവര്‍മ 
സംഗീതം : ജി ദേവരാജന്‍
ആലാപനം : പി മാധുരി

സമയമാം രഥത്തില്‍ ഞാന്‍
സ്വര്‍ഗയാത്ര ചെയ്യുന്നു...
എന്‍ സ്വദേശം കാണ്‍മതിന്നായ്
ഞാന്‍ തനിയെ പോകുന്നു...


ആകെയല്പനേരം മാത്രം
എന്‍റെ യാത്ര തീരുവാന്‍...
ആകെയരനാഴികമാത്രം    
ഈയുടുപ്പു മാറ്റുവാന്‍...


രാത്രിയില്‍ ഞാന്‍ ദൈവത്തിന്‍റെ
കൈകളിലുറങ്ങുന്നു...
അപ്പോഴുമെന്‍ രഥത്തിന്‍റെ
ചക്രം മുമ്പോട്ടോടുന്നു...


രാവിലെ ഞാന്‍ ദൈവത്തിന്‍റെ 
കൈകളില്‍ ഉണരുന്നൂ..
അപ്പോഴുമെന്‍ മനസ്സിന്‍റെ
സ്വപ്നം മുമ്പോറ്റൊടുന്നു...
ഈ പ്രപഞ്ചസുഖം നേടാന്‍
ഇപ്പോഴല്ലാ സമയം
എന്‍ സ്വദേശത്തു ചെല്ലേണം
യേശുവിനെ കാണണം...