ആരോരുമില്ലാതെ ഏതോ...

ചിത്രം : മകന്‍ എന്‍റെ മകന്‍(1985) 
രചന : പൂവച്ചല്‍ ഖാദര്‍ 
സംഗീതം : ജോണ്‍സണ്‍ 
ആലാപനം : കെ ജെ യേശുദാസ് 


ആരോരുമില്ലാതെ ഏതോ 
ഒരു കുഞ്ഞാറ്റപ്പൈങ്കിളി മാത്രം...
കാറുള്ള കോളുള്ള രാവില്‍
ഇളംചില്ലയില്‍ കേണിരുന്നൂ...
കനിഞ്ഞാ,ക്കിളിയെ-
അന്നൊരജ്ഞാതസഞ്ചാരി...


പിഞ്ചുപാദം കാണുവാന്‍
കാത്തിരുന്ന കണ്‍കളില്‍...     
പൂവിരിച്ചൂ...തൂവലാല്‍
കുരുന്നിളം പക്ഷി...
പ്രാണനില്‍ പ്രകാശവും പ്രസൂനവും തൂകീ...
ശാന്തമായ് പ്രഭാതവും പ്രദോഷവും നീങ്ങി...


ഉള്ളിന്നാഴം കാണുവാന്‍
കണ്ണില്ലാത്ത ജീവികള്‍...
കല്ലെറിഞ്ഞൂ...വാക്കിനാല്‍
നിരന്തരം കൂട്ടില്‍...
പാവം ആ പൈങ്കിളി അനാഥമായ് തന്നെ...
ഇരുണ്ടതാമീ ഭൂമിയില്‍ ഇന്നെങ്ങുപോയിടാന്‍...