പുന്നെല്ലിന്‍ കതിരോലത്തുമ്പത്തു പൂത്തുമ്പി...

ചിത്രം : മെയ്ഡ് ഇന്‍ യു എസ് എ(2005)
രചന : ഓ എന്‍ വി കുറുപ്പ്
സംഗീതം : വിദ്യാസാഗര്‍
ആലാപനം : പി ജയചന്ദ്രന്‍


പുന്നെല്ലിന്‍ കതിരോലത്തുമ്പത്തു പൂത്തുമ്പി
പൊന്നൂയലാടുന്ന ചേലുകാണാം...
പുഴവക്കില്‍ പൂക്കൈത കുളിര്‍നിലാചന്ദന-
ക്കുറിയിട്ടുനില്‍ക്കുന്ന കാഴ്ച കാണാം...
എന്നിനി...എന്നിനി...പോകും നാം
എന്‍റെ നെഞ്ചില്‍ കുറുകുന്ന പൊന്‍പ്രാവേ...


കദളിപ്പൊന്‍കൂമ്പില്‍ നിന്നിത്തിരിതേനൂറ്റി
കവിളത്തു മുത്തം പകര്‍ന്നൊരമ്മ-
അവസാന നിദ്രകൊള്ളും കുഴിമാടത്തില്‍
അണയാത്തിരിയായെരിഞ്ഞു നില്‍ക്കാം...
കാണാതിരിക്കുമ്പോള്‍ കണ്ണുനിറയുമാ
കാതരസ്നേഹത്തെയോര്‍ത്തിരിക്കാം...


കിളിപോയ തൂക്കണാംകുരുവിക്കൂടദ്ഭുത-
മിഴിയോടെ കാണും കളിത്തോഴി
എവിടെയെന്നറിയില്ലെന്നാലും എന്നോര്‍മ്മയില്‍
അവളുണ്ടൊരേ കുടക്കീഴിലിന്നും...
കാണാതെ പോയ കണ്‍മാണിക്യം തേടുന്ന
കാഞ്ചനനാഗത്തിന്‍ കഥപറയാം...